لاہور(نیوز رپورٹر) پنجاب میں سپیشل پروٹیکشن یونٹ ( ایس پی یو )کے اہلکاروں کے لیے تقریباً 10 ہفتے کا دوسرا چینی زبان کا پروگرام شروع کیا گیا ہے۔ ایس پی یو پنجاب کے لیے پہلا چینی زبان کا پروگرام 2019 میں شروع کیا گیا تھا۔ کووڈ 19 کے بعد کے منظر نامے میں، اب یہ دوسرا پروگرام ہے جس کا انعقاد چینی قونصلیٹ لاہور نے وزیراعلیٰ پنجاب کی تجویز پر کیا ہے۔ گوادر پرو کے مطابق چینی قونصلیٹ لاہور کی جانب سے پنجاب یونیورسٹی کے ریاض ہال میں ایک افتتاحی تقریب کا انعقاد کیا گیا جس میں چینی قونصل جنرل لاہور ڑا شیرین، وزیر اعلی پنجاب محسن نقوی، انسپکٹر جنرل آف پولیس پنجاب ڈاکٹر عثمان انور ، ایڈیشنل چیف سیکرٹری (ہوم)شکیل احمد، ڈپٹی انسپکٹر جنرل پولیس پنجاب طیب حفیظ چیمہ، وائس چانسلر پنجاب یونیورسٹی پروفیسر ڈاکٹر خالد محمود نے شرکت کی ۔گوادر پرو کے مطابق کورس ہر ہفتہ اور اتوار کو 10 بجے سے 12 بجے تک منعقد ہونا ہے۔ یہ 16 ستمبر تک چلے گا، تقریبا 10 ہفتوں کا وقت ہے۔ نصابی کتاب ایس پی یو افسران کے لیے تیار کی گئی ہے تاکہ وہ سی پیک یا نان سی پیک منصوبوں پر غیر ملکیوں اور خاص طور پر پنجاب بھر کے چینی باشندوں کو سیکیورٹی سروس اور تحفظ فراہم کرتے وقت حقیقی حالات سے نمٹ سکیں۔ گوادر پرو کے مطابق تدریسی کارکردگی کو بہتر بنانے کے لیے چینی قونصلیٹ لاہور نے 50 منتخب ایس پی یو افراد کو دو کلاسوں میں تقسیم کیا ہے۔ تین اساتذہ مقامی چینی کمیونٹی سے ہیں جن میں کنفیوشس انسٹی ٹیوٹ، پنجاب یونیورسٹی کے دو تدریسی معاون ہیں۔