لاہور(سپورٹس رپورٹر)پاکستان کی میزبانی میں ہونے والے ایشیا کپ سے متعلق معاملات کو حتمی شکل دیدی گئی۔ذرائع کے مطابق ایشیا کپ سے متعلق دبئی میں ہونے والے اجلاس میں پاکستان کرکٹ بورڈ، ایشی کرکٹ کونسل اور سری لنکا کرکٹ کے عہدیداروں نے شرکت کی۔ذرائع کا بتانا ہے کہ ایشیا کپ سے متعلق معاملات کو حتمی شکل دیدی گئی ہے، تفصیلات کا اعلان آج متوقع ہے۔ذرائع کا کہنا ہے کہ پاکستان میں ایشیا کپ کے چار میچز ہی کھیلے جائیں گے، پاکستان میں میچز دو وینیوز پر کھیلے جانے کا امکان ہے۔ذرائع کا بتانا ہے کہ دبئی میں ہونے والے اجلاس میں براڈ کاسٹنگ کے معاملات پر تفصیلی بات ہوئی، میٹنگ میں ٹیموں کے آنے جانے اور دیگر معاملات پر بھی تفصیلی گفتگو ہوئی۔ذرائع کے مطابق ایشین کرکٹ کونسل ایشیا کپ کے شیڈول اور وینیوز کا باضابطہ اعلان کریگا۔ایشیا کپ پاکستان میں 31 اگست سے شروع ہوگا جو 17 ستمبر تک کھیلا جائیگا، ایشیا کپ میں پاکستان سمیت بھارت، سری لنکا، بنگلہ دیش، افغانستان اور نیپال کی ٹیمیں حصہ لیں گی۔ایشین کرکٹ کونسل کا کہنا ہے کہ ٹورنامنٹ ہائبرڈ ماڈل کے تحت کھیلاجائیگا جس میں ایونٹ کے چار میچز پاکستان اور 9 میچز سری لنکا میں ہوں گے۔