اسلام آباد (نمائندہ خصوصی) گزشتہ مالی سال ترسیلات زر، برآمدات اور بیرونی سرمایہ کاری میں کمی ریکارڈ کی گئی۔ وزارت خزانہ نے ماہانہ معاشی آؤٹ لک رپورٹ جاری کر دی۔ رپورٹ کے مطابق درآمدات، کرنٹ اکاؤنٹ خسارے، روپے کی قدر اور مالی ذخائر میں بھی کمی ریکارڈ ہوئی جبکہ مہنگائی، ایف بی آر محصولات، نان ٹیکس آمدنی میں اضافہ ریکارڈ کیا گیا۔ ایک سال میں ترسیلات زر 31.3 ارب ڈالر سے کم ہو کر 27 ارب ڈالر رہیں۔ معاشی آؤٹ لک رپورٹ میں کہا گیا ہے کہ ایک سال کے دوران برآمدات میں 14.1فیصد اور درآمدات میں 27.3 فیصد کی کمی ہوئی۔ روپے کی قدر میں 67 روپے 37 پیسے کی کمی ریکارڈ کی گئی۔ ملکی مالی ذخائر میں ایک ارب 37 کروڑ ڈالر سے زائد کی کمی ہوئی۔ ایک سال میں ایف بی آر محصولات میں 16.6 فیصد اضافہ ہوا۔ ایف بی آر نے گزشتہ مالی سال 7169 ارب روپے کے محصولات اکٹھے کئے۔ مہنگائی 12.3 فیصد سے بڑھ کر 29.2 فیصد تک پہنچ گئی۔ بڑی صنعتوں کی پیداوار میں 14.4 فیصد کی کمی ریکارڈ ہوئی۔