لاہور ( سپورٹس رپورٹر ) ایشین چیمپئنز ٹرافی کھیلنے کیلئے پاکستانی ہاکی سکواڈکل یکم اگست کو بھارت روانہ ہو گا۔ ایشین ہاکی چیمپئنز ٹرافی کیلئے قومی سکواڈ واہگہ کے راستے بھارت جائیگا، عمر بھٹہ کی قیادت میں ٹیم براستہ امرتسر چنئی جائیگی۔ قومی ٹیم کے 3 آفیشلز اب بھی ویزوں کے منتظر ہیں ، ہیڈ کوچ شہناز شیخ کو بھی بروقت ویزا ملنے میں مشکلات کا سامنا ہے۔محرم الحرام کی تعطیلات کے باعث لاہور کے قریبی علاقوں کے کھلاڑی گھروں کو چلے گئے ہیں۔بھارت روانگی سے قبل ٹیم کا ایک پریکٹس سیشن لاہور میں شیڈول ہے۔واضح رہے کہ ایشین چیمپئنز ٹرافی 3 اگست سے 12 اگست تک کھیلی جائیگی جس میں پاکستان کا پہلا میچ 3 اگست کو ملائیشیا سے ہو گا جبکہ بھارت سے مقابلہ 9 اگست کو شیڈول ہے۔