حافظ آباد + سمبڑیال (نمائندہ نوائے وقت+ نمائندہ خصوصی) کالیکی ٹبہ کے قریب مٹی سے بھرے ڈمپر نے موٹر سائیکل کو ٹکر دے ماری جس کے نتیجہ میں باپ بیٹی موقع پر جاں بحق جبکہ ماں شدید زخمی ہوگئی۔ تفصیلات کے مطابق علی رضا ولد شوکت سکنہ مدینہ کالونی اپنی بیوی صائمہ اور ایک سالہ بیٹی زہرہ نور کے ہمراہ موٹر سائیکل پر سوار ہوکر آرہا تھا کہ کالیکی ٹبہ کے قریب تیز رفتار ڈمپر نے موٹر سائیکل کو ٹکر دے ماری جس کے نتیجہ میں علی رضا اور اسکی ایک سالہ بیٹی جاں بحق جبکہ بیوی شدید زخمی ہوگئی۔ جبکہ ڈمپر کا ڈرائیور موقع سے فرار ہوگیا۔ زخمی بیوی کو ٹراما سنٹر منتقل کردیا گیا۔ ادھر سمبڑیال میں حادثہ کے دوران باپ بیٹا جاں بحق ہو گئے۔ ریسکیو ذرائع کے مطابق سیالکوٹ، وزیرآباد لاہور موٹر وے انٹرچینج کے قریب موٹر سائیکل اور بس کی ٹکر کے نتیجہ میں موٹر سائیکل سوار 30سالہ باپ شکیل اور 5سالہ بیٹا سعد جاں بحق ہو گئے۔ موٹر سائیکل سوار سمبڑیال سے سیالکوٹ جارہے تھے۔ دونوں کا تعلق سیالکوٹ کے موضع مظفر پور سے ہے۔