لاہور(سپورٹس رپورٹر)تاشقند میں ہونے والی سنٹرل ایشین والی بال چیمپئن شپ کی سلور میڈلسٹ پاکستان انڈر 16 ٹیم کو کیش انعام سے نوازا گیا۔سلور میڈلسٹ پاکستان انڈر 16 والی بال ٹیم کے اعزاز میں تقریب کا انعقاد لاہور جیم خانہ کلب میں کیا گیا، تقریب میں والی بال ٹیم اور پاکستان والی بال فیڈریشن کے عہدیداران سمیت سابق والی بال کھلاڑیوں اور کاروباری شخصیات بھی موجود تھیں۔ تقریب میں سنٹرل ایشین والی بال چیمپئن شپ کی سلور میڈلسٹ ٹیم کے کھلاڑیوں اور آفیشلز میں ایک ایک لاکھ روپے انعام تقسیم کیے گئے۔اس موقع پر چیئرمین والی بال فیڈریشن چوہدری یعقوب نے کہا کہ نوجوان کھلاڑیوں نے شاندار کھیل کا مظاہرہ کیا، معمولی فرق سے ورلڈ چیمپئن شپ کیلئے کوالیفائی نہ کر سکے۔ کوالیفائی نہ کرنے کا دکھ ہے تاہم کھلاڑیوں نے شاندار کارکردگی سے دل جیت لیے، یقین ہے کہ مستقبل میں بھی یہ بچے بہترین پرفارمنس سے ملک کا نام روشن کریں گے۔