کوئٹہ (نوائے وقت رپورٹ ) کوئٹہ میں موتی رام روڈ پر ڈیکوریشن کی دکان میں دھماکہ سے   دو افراد زخمی ہو گئے، دھماکے کی آواز دور دور تک سنائی دی۔ ایس ایس پی آپریشن زوہیب محسن نے میڈیا سے گفتگو کرتے ہوئے بتایا دھماکہ موتی رام روڈ پر ایک دکان میں ہوا ، تفتیش جاری ہے۔ زوہیب محسن نے کہا دکان میں پٹاخے اور دیگر آتش بازی کا سامان موجود تھا۔ ایس ایس پی آپریشن نے کہا دکان کی چھت ٹی آرگارڈرز سے بنی ہونے کی وجہ سے گری ، اگر کوئی دھماکہ خیز مواد ہوتا تو دیواروں پر نشانات ہوتے۔ریسکیو کے مطابق دھماکے کے بعد دکان میں آگ بھی لگ گئی، دکان میں آگ لگنے کے بعد فائر بریگیڈ طلب کرلی گئی۔ دھماکے کے مقام پر ہار ، پھول، جھنڈے اور  بیجز کی دکانیں ہیں۔دھماکے میں زخمی ہونے والے 2 افراد کو سول ہسپتال کوئٹہ منتقل کردیا گیا ہے۔ دھماکے کے بعد پولیس اور سکیورٹی فورسز نے علاقے کو گھیرے میں لے لیا ۔