سرگودھا (نمائندہ خصوصی) سرگودھا لاہور روڈ پر تیز رفتار مسافر بس نے موٹر سائیکل کو کچل دیا۔ اس پر سوار میاں بیوی اور ان کے دونوں بچے جاں بحق ہو گئے جن کی نعشوں کو ریسکیو کر کے ہسپتال منتقل کر دیا گیا اور بس ڈرائیور موقع سے فرار ہو گیا۔ ذرائع کے مطابق سرگودھا لاہور روڈ پر قصبہ بھاگٹانوالہ کے قریب سرگودھا سے لاہور جانے والی تیز رفتار مسافر بس نے موٹر سائیکل کو کچل دیا جس کے نتیجہ میں موضع چوکیرہ کا 35 سالہ محمد عنصر اس کی اہلیہ 32 سالہ عنصراں بی بی اور ان کے دو بچے دس سالہ امان اللہ، 8 سالہ گلشن بی بی جاں بحق ہو گے جن کی نعشوں کو ریسکیو کر کے ڈی ایچ کیو ہسپتال منتقل کر دیا گیا۔ ٹریفک حادثہ میں خاتون اور کمسن بچی جاں بحق ہو گئے۔ پرویز اپنی بیوی سکینہ بی بی اور بچوں کے ساتھ رکشہ پر اوکاڑہ سے لاہور کو جارہا تھا کہ ملتان روڈ پر مسافر بس نے اسے ٹکر دے ماری جس کے نتیجہ میں 36/35 سالہ سکینہ بی بی موقع پر ہی دم توڑ گئی جبکہ پرویز اور اس کے بچے زخمی ہو گئے جنہیں ریسکیو1122 کے عملے نے ٹی ایچ کیو ہسپتال پتوکی منتقل کر دیا۔ دوران علاج زخمی بچوں میں سے 4ماہ کی تسلیم بی بی کی بھی ڈیتھ ہوگئی۔  ہنگو میں کار بے قابو ہوکر درخت سے ٹکرا گئی جس کے نتیجے میں سابق رکن اسمبلی خورشید بیگم کے شوہر انتقال کر گئے۔ مقامی پولیس کے مطابق کار کے بے قابو ہوکر درخت سے ٹکرانے کا واقعہ درسمند میں پیش آیا۔ پولیس کے مطابق جاں بحق ایڈووکیٹ سعید شاہ بخاری سابق ایم پی اے خورشید بیگم کے شوہر تھے۔ حادثے کی وجوہات کا پتہ لگایا جا رہا ہے۔