اٹک+لاہور (این این آئی+نامہ نگار)پولیس سٹیشن اٹک خورد میں آسمانی بجلی گر گئی جس کے نتیجے میں عمارت گرنے سے 5اہلکار زخمی ہو گئے۔ترجمان اٹک پولیس کے مطابق حادثے میں زخمی اہلکاروں کو قریبی ہسپتال منتقل کر دیا گیا ہے۔زخمی ہونے والوں میں اے ایس آئی امتیاز، وائرلیس آپریٹر بلاول صدیقی، کانسٹیبل سجاد، کانسٹیبل فیضان اور کانسٹیبل توقیر شامل ہیں۔ آسمانی بجلی گرنے سے تھانہ اٹک خورد کی بلڈنگ کا بہت بڑا حصہ گرا اورتھانے کے احاطے میں کھڑی گاڑیوں کو بھی نقصان پہنچا ۔انسپکٹر جنرل پولیس پنجاب ڈاکٹر عثمان انور نے معاملہ کا نوٹس لیتے ہوئے آر پی او راولپنڈی سے رپورٹ طلب کر لی ہے۔ آئی جی پنجاب نے ڈی پی او اٹک کو واقعہ کی تمام پہلوؤں سے انکوائری کا حکم دیا۔ آئی جی پنجاب نے ہدایت کی کہ زخمی ہونے والے اہلکاروں کو علاج معالجے کی بہترین سہولیات فراہم کی جائیں۔