لاہور(سپورٹس رپورٹر)30 ویں ایشین جونیئر سکواش چیمپئن شپ چین میں شروع ہوگئی، پہلے روز پاکستان کے تمام پلیئرز نے مختلف ایج گروپس میں اپنے اپنے میچز جیت لیے۔ایشین جونیئر انفرادی چیمپئن شپ چین کے شہر دالیان میں شروع ہوئی، پہلے روز انڈر 19 میں پاکستان کے انس علی شاہ نے پہلے میچ میں ملائشین پلیئر تھو وا یان کو تین ایک سے ہرایا۔ ملائیشین پلیئر کیخلاف انس کی جیت کا سکور 11-4، 8-11، 6-11 اور 3-11 رہا۔ دوسرے راؤنڈ میں انس بھارت کے سوریا باوا سے مقابلہ کریں گے۔انڈر 17 میں عبداللہ نواز اور  عبداللہ ندیم بھی پہلے راؤنڈ میں کامیاب رہے۔ عبداللہ نواز نے بھارت کے گورویر سنگھ کو تین صفر سے شکست دی۔ گورویر کیخلاف عبداللہ نے 3-11، 7-11 اور 4-11 سے میچ جیتا جبکہ عبداللہ ندیم نے مکاؤ کے لیونگ کینگ ان کو 18 منٹ میں چت کردیا۔انڈر 15 میں پاکستان کے ابراہیم زیب نے پہلے راؤنڈ میں چینی پلیئر ہین لی چون کو 15 منٹ میں تین - صفر سے آؤٹ کلاس کیا جبکہ انڈر 13 میں احمد رایان اور نعمان خان نے اپنے اپنے میچز جیت لیے۔ نعمان نے ہانگ کانگ کے چینگ اوگسٹ ہونگ اور احمد رایان نے ملائیشیا کے جیدن لو وہ کو ہرایا۔