لاہور(سپورٹس رپورٹر) پاکستان ہاکی فیڈریشن کے زیر انتظام ماڑی پٹرولیم کمپنی لمیٹڈ کے زیر اہتمام دوسرا ماڑی پٹرولیم آزادی کپ ہاکی ٹورنامنٹ 2023ء لیفٹیننٹ جنرل اشفاق ندیم ہاکی سٹیڈیم راولپنڈی میں کھیلا جارہا ہے۔ٹورنامنٹ کے تیسرے دن پہلا میچ پاکستان پولیس اور پاکستان آرمی وائٹ کے مابین کھیلا گیا۔ پاکستان پولیس نے بہترین کھیل پیش کرتے ہوئے 3 کے مقابلے میں 5 گول سے  پاکستان آرمی وائٹ کو شکست سے دوچار کردیا۔ پاکستان پولیس کی جانب سے ابوذر نے 2 گول جبکہ بلال اسلم، شاہ جی اور حمزہ نے ایک ایک گول سکور کیا۔ پاکستان آرمی وائٹ کی جانب سے عباس نے 2 گول اور یاسر نے ایک گول سکور کیا۔ ٹورنامنٹ کے تیسرے دن دوسرا میچ پاکستان واپڈا اور پنجاب رینجرز کے مابین کھیلا گیا،پاکستان واپڈا نے شاندار کھیل کا مظاہرہ کرتے ہوئے 1 گول کے مقابلے میں 10 گول سے شکست دے دی۔ تیسرے میچ میں پاکستان آرمی کلرز نے 1 کے مقابلے میں 2 گول سے جیت لیا۔موقع پر ٹورنامنٹ ڈائریکٹر اولمپیئن ناصر علی ، اولمپیئن شہناز شیخ ، ٹورنامنٹ آرگنائزنگ سیکرٹری کرنل محمد یامین، اسسٹنٹ ٹورنامنٹ ڈائریکٹر میجر طارق ورک، اسسٹنٹ ٹورنامنٹ ڈائریکٹر راجہ شجاع اقبال، ایمپائرز منیجر ذوالفقار حسین ، اسسٹنٹ ایمپائرز مینیجر کامران شاہ ، اسسٹنٹ ایمپائرز مینیجر مبارک علی ، ایونٹ میڈیا کوآرڈینیٹر ذوالفقار بیگ ، اسسٹنٹ میڈیا کوآرڈینیٹر محمد حفیظ ،حاجی نعیم اور ان کی ٹیم  کے ساتھ شائقین ہاکی کی کثیر تعداد اسٹیڈیم میں موجود تھی۔