لاہور (نامہ نگار) اینٹی نارکوٹکس فورسز نے جعفر ایکسپریس کے گارڈ انچارج اور اسسٹنٹ ایگزامینر الیکٹرک کو چرس اور افیون سمیت گرفتار کر لیا ہے۔ اینٹی نارکوٹکس فورس نے بذریعہ ٹرین منشیات سمگلنگ کے خلاف کریک ڈاؤن کیا۔ حکام کا کہنا ہے کہ راولپنڈی، پشاور، لاہور، کراچی اور کوئٹہ سمیت تمام بڑے جنکشنز پر ٹرینوں کو چیک کیا گیا۔ ٹرین کے ذریعے منشیات سمگلنگ کی اطلاعات ملی تھیں۔ جعفر ایکسپریس میں گجرات جنکشن کے مقام پر کارروائی کے دوران جعفر ایکسپریس کا گارڈ انچارج اور اسسٹنٹ ایگزامینر الیکٹرک گرفتار کر لیا گیا۔ ملزمان کی سرکاری پیٹی سے 4 کلو گرام چرس اور 2 کلو گرام افیون برآمد ہوئی۔ ملزمان منشیات راولپنڈی سے جیکب آباد سمگل کرنے کی کوشش کر رہے تھے۔