لاہور(سپورٹس رپورٹر)پاکستان کرکٹ بورڈ اور کھلاڑیوں کے درمیان سنٹرل کنٹریکٹ کا معاملہ حل نہ ہوسکا، معاملات کے حل کیلئے چیئرمین پی سی بی ذکا اشرف آج کھلاڑیوں سے ملاقات کریں گے۔ذرائع کے مطابق چیئرمین پی سی بی ذکا اشرف لنکا پریمیر لیگ کا فائنل دیکھنے کیلئے اس وقت سری لنکا میں موجود ہیں اورآج کولمبو سے ہمبنٹوٹا روانہ ہوں گے جہاں وہ قومی ٹیم کے کپتان بابر اعظم سمیت ون ڈے سکواڈ میں شامل تمام کھلاڑیوں سے افغانستان کیخلاف سیریز اور ایشیا کپ کے حوالے سے گفتگو کریں گے۔ذکا ء اشرف قومی سکواڈ کے ہمراہ آج دوپہر کا کھانا کھائیں گے جبکہ کھلاڑیوں سے سنٹرل کنٹریکٹ اور لیگز کھیلنے کے حوالے سے پالیسی اور دیگر معاملات میں شیئر کے حوالے سے بھی اہم گفتگو کریں گے۔سنٹرل کنٹریکٹ کے حوالے سے کئی معاملات اب بھی حل طلب ہیں، چیئرمین پی سی بی اور کھلاڑیوں کے درمیان  ملاقات میں معاملات طے پانے کا امکان ظاہر کیا جا رہا ہے۔ اگلے ہفتے تک سنٹرل کنٹریکٹ پر تمام معاملات طے پا جانے کی امید ہے۔