فیصل آباد+جڑانوالہ+اسلام آباد (خبرنگارخصوصی+نمائندہ خصوصی+ نمائندہ نوائے وقت+نوائے وقت رپورٹ) نگران وزیراعظم انوارالحق کاکڑ نے ملک کی تمام اقلیتی برادریوں کو یقین دلایا ہے کہ حکومت ان کی جان ومال کے تحفظ کےلئے پرعزم ہے، ان کےخلاف گھناﺅنے حملوں کا ارتکاب کرنے والوں کو انصاف کے کٹہرے میں لایا جائے گا ۔آئندہ کسی اقلیت کے ساتھ ایسی مذموم حرکت کرنے والوں کو نشان عبرت بنادیا جائےگا، ریاست مظلوم کے ساتھ ہو گی، معاشرہ میں عدل و انصاف ریاست کی ذمہ داری ہے، اس کے بغیر کوئی معاشرہ قائم نہیں رہ سکتا۔ جڑانوالہ میں 16 اگست کے متاثرین میں 20، 20 لاکھ روپے کے چیک تقسیم کرنے کی تقریب سے خطاب کرتے ہوئے نگران وزیراعظم انوارالحق کاکڑ نے کہا کہ نگران وزیراعظم کا عہدہ سنبھالے ہوئے صرف 2 دن ہی ہوئے تھے کہ یہ افسوس ناک واقعہ رونما ہو گیا۔ان کا کہنا تھا کہ انتظامیہ اور پولیس حکام سمیت سیکیورٹی ایجنسیوں کے تعاون سے تمام ممکن اقدامات یقینی بناتے ہوئے واضح ہدایات جاری کیں کہ نہ صرف اقلیتوں کے حقوق خواہ وہ مسیحی ہوں، ہندو، پارسی یا کسی اور مذہب کے پیروکاروں کے حقوق کا تحفظ یقینی بنایا جائے گا۔ انہوں نے کہا کہ لاقانونیت کی کوئی بھی کارروائی برداشت یا معاشرے میں نفاق ڈالنے اور انتشار پھیلانے کی کوشش کامیاب نہیں ہونے دی جائے گی۔ انوارالحق کاکڑ کا کہنا تھا کہ آج ان کے جڑانوالہ آنے کا مقصد بھی یہی ہے کہ وہ اپنی اقلیتوں کو یقین دلانا چاہتے ہیں کہ کسی کو پر تشدد رویہ اختیار کرنے کی اجازت نہیں دی جائے گی اور نہ ہی مذہب، دین، نسل یا زبان کی بنیاد پر کسی کو نشانہ بننے دیا جائے گا۔انہوں نے کہاکہ مشنری اداروں کی پاکستان کیلئے خیبر سے کراچی تک ناقابل فراموش خدمات ہیں اور وہ خود بھی ابتدائی تعلیم سینٹ فرانسس سکول سے حاصل کر چکے ہیں جہاں کرسچین اساتذہ نے انہیں پڑھنا، بولنا،چلنا سکھایا۔ ہمیں خوشی ہے کہ ملک کے نامزد چیف جسٹس آف پاکستان جسٹس قاضی فائز عیسی نے خود جڑانوالہ کا دورہ کر کے یہ بات واضح کر دی کہ اقلیتوں کے حقوق کی پامالی برداشت نہیں کی جائے گی جبکہ چیف آف آرمی سٹاف سید عاصم منیر کا بھی دو ٹوک م قف ملک و امن دشمنوں کیلئے واضح پیغام ہے کہ ہم اس قسم کی قانون شکنی پر کوئی سمجھوتہ نہیں کریں گے۔انہوں نے کہا کہ جہاں بھی اقلیتوں کے حقوق کی بات ہوگی تو ریاست اپنی اقلیتوں کے ساتھ کھڑی ہوگی، پاکستانی پرچم میں سفید حصہ ان اقلیتوں کے حقوق کے تحفظ کا نگہبان ہے۔ان کا کہنا تھا کہ ریاست مسیحی، ہندو، سکھ، پارسی یا دیگر اقلیتوں کے خلاف نفرت آمیز عمل کے مظاہرے کی اجازت نہیں دے گی، قائد اعظم ہمارے آئیڈیل رہنما تھے جنہوں نے قومی ریاست اور قومی وحدت کا درس دیا۔نگران وزیر اعظم نے کہا کہ پاکستان میں بسنے والی اقلیتوں کے جان، مال، عزت اور آبرو کا تحفظ اور معاشرے میں عدل و انصاف ریاست کی ذمہ داری ہے کیونکہ اس کے بغیر معاشرہ قائم نہیں رہ سکتا۔انہوں نے کہا کہ صرف انصاف کے حصول کا احساس ہی یہ ضمانت دیتا ہے کہ ملک میں بسنے والے سب یکساں ہیں۔ان کا کہنا تھا کہ جو بھی مملکت اور معاشرے پر دشمن بن کر وار کرے گا ریاست، قانون، آئین، عسکری قیادت اس کے سامنے سیسہ پلائی دیوار بن کر کھڑی ہوگی۔انوارالحق کاکڑ کا کہنا تھا کہ اگرچہ آنے والا کل کسی کے کنٹرول میں نہیں لیکن وہ یہ یقین ضرور دلائیں گے کہ اگر کسی شر پسند نے دوبارہ کسی اقلیت کے ساتھ ایسا وار کرنے کی کوشش کی تو وہ نشان عبرت بن کر رہے گا اور ریاست مظلوم کے ساتھ کھڑی ہوگی۔انہوں نے کہا کہ قرآن پاک نے بھی کبھی سیدنا مریم، کبھی موسیٰ اور کبھی آل عمران کا حوالہ دیا لہٰذا ہم بھی اپنے آخری نبیﷺ کی تعلیمات پر عمل پیرا ہو کر ان کے ماننے والوں کی آبرو، عزت، جان اور مال کا تحفظ یقینی بنائیں گے۔ان کا کہنا تھا کہ جن لوگوں نے پاکستان کے امن پر وار کیا ہے ہم انہیں اچھی طرح جانتے ہیں اور ان کے ہدف اور مقاصد سے بھی آگاہ ہیں، لیکن ہم ان کو بتا دینا چاہتے ہیں کہ ہم اقلیتوں کا تحفظ کرنا جانتے ہیں اور ذمہ داران کو انصاف کے کٹہرے میں لا کر کیفر کردار تک پہنچائیں گے۔نگران وزیر اعظم نے کہا کہ یورپ، امریکا، بھارت اور دیگر ممالک میں بھی اقلیتوں کے ساتھ ناخوش گوار واقعات رونما ہو جاتے ہیں لیکن یہ وہاں کی حکومتوں کی ذمہ داریاں ہیں کہ وہ اپنے قوانین کے مطابق ان سے نمٹیں، لیکن ہم اس ضمن میں کسی قسم کی کمی کا مظاہرہ نہیں کریں گے۔انہوں نے کہا کہ تمام ریاستی ادارے اپنی اقلیتوں کے ساتھ کھڑے ہیں اور وہ اکثریت کے فاشسٹ ایجنڈے کو نہ تو تحفظ دیں گے اور نہ ہی اکثریت کے خیالات زبردستی اقلیت پر تھونپنے کی کوشش کی جائے گی، جہاں بھی ظلم اور زیادتی ہوئی ہم وہاں حق کی آواز بن کر ساتھ دیں گے۔اس موقع پر گورنر پنجاب محمد بلیغ الرحمٰن، نگران وفاقی وزیر اطلاعات و نشریات مرتضیٰ سولنگی، نگران وفاقی وزیر داخلہ سرفراز بگٹی، وفاقی وزیر انسانی حقوق خلیل جارج، نگران وزیر اعلیٰ پنجاب محسن نقوی، چیف سیکریٹری پنجاب زاہد اختر زمان، آئی جی پنجاب ڈاکٹر عثمان انور اور دیگر اعلیٰ حکام بھی موجود تھے۔

اسلام آباد (خبرنگار خصوصی) نگران وزیراعظم انوار الحق کاکڑ سے سعودی عرب کے حج و عمرہ کے وزیر ڈاکٹر توفیق بن فوزان الربیعہ نے ملاقات کی۔ وہ سعودی وزیر خارجہ امور، داخلہ، سعودی سول ایوی ایشن اتھارٹی، مواصلات، سیاحت سمیت دیگر ارکان کے ساتھ ایک اعلی سطحی وفد کی قیادت کر رہے تھے۔ وزیراعظم نے وفد کا خیرمقدم کیا اور سعودی عرب کے ساتھ دوطرفہ مثبت تعلقات پر اطمینان کا اظہار کیا۔ انہوں نے ولی عہد شہزادہ محمد بن سلمان کے وژن کو سراہتے ہوئے کہا کہ پاکستان ہمیشہ سعودی عرب کا قابل اعتماد شراکت دار رہے گا۔ وزیراعظم نے رواں حج سیزن کے دوران دنیا بھر سے حجاج کرام بالخصوص پاکستانی عازمین کے لئے بہترین انتظامات کرنے پر سعودی قیادت کا شکریہ ادا کیا۔ انہوں نے اس امید کا اظہار کیا کہ سعودی عرب پاکستانی حج اور عمرہ زائرین کیلئے خصوصی سلوک جاری رکھے گا۔ وزیراعظم نے خصوصی سرمایہ کاری سہولت کونسل (ایس آئی ایف سی) کے تحت پاکستان میں سرمایہ کاری کے مواقع میں سنجیدہ دلچسپی لینے پر سعودی عرب کا شکریہ بھی ادا کیا۔ واضح رہے کہ سعودی عرب کے کسی وزیر حج و عمرہ کا پاکستان کا یہ پہلا دورہ ہے۔ سعودی وزیر نے ان کی اور ان کے وفد کے ارکان کی پرتپاک مہمان نوازی پر وزیراعظم کا شکریہ ادا کیا۔ انہوں نے کہا کہ سعودی عرب پاکستانی عازمین حج کو ہر ممکن سہولت فراہم کرے گا۔ انہوں نے کہا کہ وفد مذہبی دوروں کے علاوہ پاکستان میں سعودی سیاحت کو فروغ دینے کی بھی کوشش کرے گا۔ علاوہ ازیں نگران وزیراعظم انوار الحق کاکڑ 2 روزہ دورے پر آج کراچی پہنچیں گے۔ ذرائع کے مطابق نگران وزیراعظم مزار قائد پر حاضری دیں گے۔ وہ سندھ کے نگران وزیراعلیٰ اور ان کی کابینہ سے ملاقات کریں گے۔ گورنر سندھ بھی نگران وزیراعظم سے ملاقات کریں گے۔ نگران وزیراعظم ایم کیو ایم رہنما¶ں سمیت مختلف وفود سے ملاقاتیں کریں گے۔