کاہنہ: 24 لاکھ کی چوری‘ شاہدرہ 18‘ مصطفیٰ ٹاؤن میں 14 لاکھ کا ڈاکہ
لاہور (نامہ نگار) شہر میں ڈاکوؤں اور چوروں نے چوری و ڈکیتی کی وارداتوں میں متعدد شہریوں سے کروڑوں روپے‘ طلائی زیورات، موبائل فون، موٹر سائیکلیں، گاڑیاں اور دیگر سامان لوٹ لیا۔ تفصیلات کے مطابق کاہنہ میں چور رخسانہ بی بی کے گھر سے 24 لاکھ‘ طلائی زیورات اور کار لے کر فرار ہو گئے۔ ڈاکو شاہدرہ میں عبدالرئوف کی فیملی سے 18لاکھ 75ہزار کے طلائی زیورات، نقدی اور موبائل فون، مصطفی ٹاؤن میں محمد ندیم کے گھر سے اسلحہ کے زور پر اہلخانہ کو یرغمال بنا کر 14لاکھ‘ طلائی زیورات اور نقدی، کاہنہ میں ملک ریاض کے آفس سے 3 لاکھ کے لیپ ٹاپ، موبائل فون اور نقدی، نشتر کالونی میں سرفراز سے 35ہزار اور موبائل فون، کوٹ لکھپت میں زین سے 85ہزار‘ موبائل فون اور نقدی، مناواں میں فیصل سے اڑھائی لاکھ روپے لوٹ کر فرار ہو گئے۔ ملت پارک، غالب مارکیٹ، فیکٹری ایریا، ہنجروال اور جوہر ٹاؤن سے پانچ کاریں جبکہ مانگا منڈی، گڑھی شاہو، غازی آباد، راوی روڈ، ساندہ، مصری شاہ، باغبانپورہ، برکی، ڈیفنس، جنوبی چھاؤنی اور ماڈل ٹاؤن سے گیارہ موٹر سائیکلیں چوری کر لی گئیں۔
