ورلڈکپ‘ پاکستان کے 9میچز میں سے 4کے ٹکٹس ہاتھوں ہاتھ فروخت
لاہور(سپورٹس رپورٹر ) بھارت میں شیڈول ورلڈکپ دیکھنے کے خواہشمند فینز کیلئے ٹکٹس کی فروخت کا سلسلہ جاری ہے۔ بھارتی میڈیا کے مطابق آئی سی سی ورلڈکپ 2023 میں پاکستان کے شیڈول 9 میچز میں سے 4 کے ٹکٹس ہاتھوں ہاتھ فروخت ہوچکے ہیں جبکہ پانچ میچز کے بھی محض چند ٹکٹس ہی باقی رہ گئے ہیں۔ گرین شرٹس کے جن ٹیموں سے مقابلے کے ٹکٹس فروخت ہوچکے ہیں ان میں بنگلورو میں پاکستان بمقابلہ آسٹریلیا، اسی شہر میں نیوزی لینڈ بمقابلہ پاکستان، کولکتہ میں پاکستان بمقابلہ بنگلہ دیش اور اسی شہر میں انگلینڈ بمقابلہ پاکستان کے میچز شامل ہیں۔ روایتی حریف پاکستان اور بھارت کے درمیان ٹکٹس کی فروخت کا آغاز 3 ستمبر کو شروع ہونے کا امکان ہے۔
