رومانیہ، گیس سٹیشن میں دھماکے سے ایک شخص ہلاک، 46 زخمی
بخارسٹ(این این آئی)رومانیہ میں بخارسٹ کے قریب مائع پٹرولیم گیس سٹیشن پر دو دھماکوں کے نتیجے میں ایک شخص ہلاک اور 46زخمی ہو گئے۔فرانسیسی خبررساں ادارے کے مطابق رومانیہ کے ایمرجنسی ڈیپارٹمنٹ کے سربراہ رائد عرفات نے میڈیا کو بتایاکہ گزشتہ روز دارالحکومت کے شمال میں واقع کریوڈیا کمیون میں دھماکے اور آگ لگنے کی اطلاع کے بعد ریسکیو اہلکار پہنچے تو وہاں دوسرا دھماکہ ہوگیا جس کے نتیجے میں ایک شخص ہلاک اور 26فائر فائٹرز سمیت46افراد زخمی ہوگئے ہیں ۔انہوں نے بتایا کہ جائے وقوعہ سے تمام لوگوں کو نکال لیا گیا ہے تاہم علاقے کا جائزہ لینے کی ضرورت ہے۔ہلاک ہونے والے شخص اور تمام زخمیوں کو بخارسٹ کے سرکاری ہسپتال میں منتقل کر دیا گیا ہے ۔
رومانیہ گیس سٹیشن دھماکہ
