لاہور(نامہ نگار)شہر میں ٹریفک حادثات کے دو مختلف واقعات میں ایک نوجوان جاں بحق جبکہ دو افراد زخمی ہو گئے ہیں۔فیروز پور روڈ پر دو موٹر سائیکل سوار نوجوانوں کو تیز رفتار ٹرک نے کچل ڈالا۔جس کے نتیجے میں موٹر سائیکل سوار22سالہ نوجوان جہانزیب موقع پر جاں بحق اور تنویر شدید زخمی ہوگیا جبکہ ٹرک ڈرائیور موقع سے فرار ہوگیا۔پولیس نے جاں بحق نوجوان کی نعش پوسٹ مارٹم کیلئے مردہ خانے منتقل کر دی ہے جبکہ زخمی کوہسپتال داخل کرا دیا گیا ہے۔ لاری اڈہ کے سامنے ٹریکٹر ٹرالی اور شہزور ڈالے میں تصادم کے نتیجے میں ڈالے کا ڈرائیور زخمی ہوگیا۔ جس کی شناخت اسد کے نام سے ہوئی ہے جسے میو ہسپتال منتقل کر دیا گیاہے۔پولیس کا کہنا ہے کہ ٹریکٹر ٹرالی نے ون وے کی خلاف ورزی کی جس سے حادثہ پیش آیاحادثہ میں شہزور ڈالے مکمل طور پر تباہ ہو گیا جبکہ ٹریکٹر ٹرالی کا ڈرائیور موقع سے فرار ہو گیا۔ٹریکٹر ٹرالی کو قبضہ میں لے کر اس کے ڈرائیور کیخلاف قانونی کارروائی شروع کر دی گئی ہے۔