لاہور(سپورٹس رپورٹر) جنوبی افریقا کی ویمن کرکٹ ٹیم اپنے پہلے دورہ پاکستان کے لیے کراچی پہنچ گئی۔  افریقی ٹیم دبئی کے راستے پرواز EK600 سے کراچی پہنچی، جس پر ان کا جناح انٹرنیشنل ائیرپورٹ پر شاندار استقبال کیا گیا، کھلاڑیوں کو پھولوں کے ہار پہنائے گئے اور گلدستے بھی پیش کیے گئے۔جنوبی افریقی ویمن کرکٹ ٹیم کی سکیورٹی کیلئے صدر مملکت کا پروٹوکول دیا جارہا ہے، کراچی ائیرپورٹ ٹرمینل ون سے ٹیم کی قیام گاہ تک سخت سکیورٹی انتظامات کیے گئے ۔ ایس ایس یو کمانڈوز، رینجرز، پولیس اور دیگر اداروں کے اہلکاروں کی بھاری نفری تعینات کی گئی  ،ٹیم کو سخت ترین حفاظتی حصار میں مقامی ہوٹل پہنچایا گیا۔ جنوبی افریقہ اور پاکستان ویمن کرکٹ ٹیموں کے مابین نیشنل سٹیڈیم میں 3ٹی ٹونٹی میچز کھیلے جائیں گے۔ 1، 3اور 5 ستمبر کو تین ٹی ٹونٹی میچز شام ساڑھے 7بجے شروع ہوں گے۔ پاکستان ویمن کرکٹ ٹیم مہمان ٹیم کیساتھ 8، 11 اور 14 ستمبر کو ون ڈے کرکٹ میچ کھیلے گی، ون ڈے سیریز آئی سی سی چیمپئن شپ کا حصہ ہے۔ 20 روزہ دورہ مکمل کرکے افریقی خواتین کرکٹرز 15 ستمبر کو وطن واپس روانہ ہوں گی۔کراچی پہنچنے والے افریقی سکواڈ میں کھلاڑی، کوچنگ سٹاف اور مینجمنٹ شامل ہے،کپتان لورا وولوارڈٹ، ماریزان کیپ اور نادین ڈی کلرک 29 اگست کو کراچی پہنچیں گی، ٹیم فزیو تھراپسٹ مولبتسی فیلانے بھی 29 اگست کو پہنچیں گے۔