ریاض (اے پی پی)سعودی عرب سے پہلا امدادی طیارہ لیبیا پہنچ گیا ہے، سعودی خبررساں ادارے کے مطابق خادم حرمین الشریفین شاہ سلمان بن عبد العزیز اور ولی عہد شہزادہ محمد سلمان کی ہدایت پر عمل کرتے ہوئے سعودی عرب سے پہلا امدادی طیارہ لیبیا کے شہر بن غازی پہنچ گیا ہے ۔ ریاض کے کنگ خالد انٹر نیشنل ایئرپورٹ سے بن غازی بھیجے والے طیارے میں 90 ٹن امدادی سامان ہے۔کنگ سلمان سینٹر برائے انسانی امداد نے کہا ہے کہ امدادی سامان میں خشک راشن، خیمے اور مختلف قسم کے طبی آلات موجود ہیں۔یہ امدادی سامان کنگ سلمان سینٹر کے اہلکار لیبیا کے ہلال احمر کے حوالے کریں گے۔