اوکاڑہ (نوائے وقت رپورٹ) اوکاڑہ کی تحصیل دیپالپور سے اغوا کے بعد بازیاب ہونے والی سکینڈ ایئر کی طالبہ کو مقامی عدالت میں پیش کر دیا گیا۔ طالبہ نے بیان دیا ہے کہ ملزمان نے اغوا کرنے کے بعد اسے ایک کمرے میں بند رکھا اور اس سے اس کے والد اور بھائیوں کے نام پوچھتے رہے۔ پولیس کے مطابق دیپالپور میں ملزموں نے طالبہ کو جمعہ کے روز اس وقت ایک کار میں اغوا کر لیا تھا جب وہ کالج سے واپس گھر آ رہی تھی۔ طالبہ کے اغوا کی سی سی ٹی وی ویڈیو بھی سامنے آئی تھی، جس کے بعد پولیس نے مقدمہ درج کر کے ملزموں کی تلاش شروع کر دی تھی۔ ملزم 30 گھنٹے بعد طالبہ کو اوکاڑہ میں چھوڑ کر فرار ہو گئے۔