لاہور( این این آئی)پاکستان پیپلز پارٹی وسطی پنجاب کے جنرل سیکرٹری سید حسن مرتضیٰ نے مسلم لیگ (ن) کے رہنما حنیف عباسی کی جانب سے اپنے بیان پر معافی مانگنے کے اقدام کا خیر مقدم کرتے ہوئے کہا ہے کہ بھٹو شہید قوم کی لیڈر ہیں ،بھٹو شہید کی عظمت کا اعتراف کر کے حنیف عباسی نے اپنی غلطی سدھار لی۔ اپنے بیان میں انہوں نے کہا کہ جہاں تک کارکردگی کا معاملہ ہے تو میرا مناظرے کا چیلنج برقرار ہے، بھٹو شہید نے ایٹمی پروگرام دیا تو بی بی شہید نے میزائل ٹیکنالوجی دی، پاکستان میں انٹرنیٹ لاکر دنیا سے جوڑنے کا کارنامہ بھی بی بی شہید کا ہے، (ن)لیگ ہو یا سکے کا دوسرا رخ پی ٹی آئی انہوں نے عوام سے حقوق چھینے ہیں، پیپلز پارٹی نے لوگوں کو روزگار دیا (ن) لیگ نے روزگار چھینا، یہاں تک کہ نوا شریف نے روزگار دینے کے الزام میں پیپلز پارٹی کے رہنماﺅں کو قید رکھا ، پیپلزپارٹی نے ہر دور میں لوگوں کو گھر دیئے، (ن) لیگ نے غریب کو بے گھر کیا، پیپلز پارٹی نے بڑے ہسپتال، اعلی تعلیمی ادارے بنائے، (ن) لیگ نے نجکاری کے نام پر عوام سے بنیادی سہولیات چھینیں، آج سندھ کے ہسپتالوں سے پنجاب کے لوگ مفت علاج کروا رہے ہیں ، آئیں (ن) لیگ اپنی کارکردگی رکھے میں اپنی رکھتا ہوں ۔ انہوں نے کہا کہ (ن) لیگ عمران خان کی جگہ لینے کی کوشش میں اخلاقیات کا جنازہ نہ نکالے ، نواز شریف سیاسی مخالفت کو ذاتی دشمنی میں بدلنے کی اپنی پرانی روایت زندہ نہ کریں ، نیب کا ادارہ نواز شریف صاحب نے بنایا خود اس کا شکار ہوئے ، نواز شریف صاحب ماضی سے سبق حاصل کرتے ہوئے جماعت کو ہوش کے ناخن لینے کا کہیں ۔