اسلام آباد (خبر نگار خصوصی) پاکستانیوں کی امریکی ویزا کی درخواستوں کی تعداد تاریخ کی بلند ترین سطح پر پہنچ گئی۔ امریکی سفارتخانے کے مطابق پاکستان سے امریکی ویزوں کی طلب اب تک کی بلند ترین سطح پر پہنچ چکی ہے اور امریکی مشن ماضی کی نسبت زیادہ سے زیادہ ویزا درخواستیں نمٹانے کیلئے کوشاں ہے۔ امریکی سفارتخانے کا کہنا ہے کہ ویزا اپائنٹمنٹ کے انتظار کی مدت میں کمی کیلئے سخت محنت کر رہے ہیں اور درخواست گزاروں کی سہولت کیلئے تین طریقوں سے کام کررہے ہیں۔ امریکی سفارتخانے کے مطابق نان امیگرنٹ ویزا کیلئے ہزاروں درخواستوں پر عمل درآمد تیزکر دیا گیا ہے اور دس ہزار درخواست گزاروں کی پہلے سے 2024 میں طے اپائنٹمنٹ کی مدت کم کردی ہے۔ بیان میں بتایا گیا ہے کہ کراچی میں امریکی قونصل خانے میں 10 ہزار درخواست گزاروں کی مدت اب 2023 مقرر کی جارہی ہے اور درخواست گزاروں کو اپائنٹمنٹ مدت میں کمی کی اطلاع جلد موصول ہونے والی ہے، ان درخواست گزاروں میں سے بعض کی اپائنٹمنٹ اگلے ہفتے طے ہوسکتی ہیں۔ امریکی سفارتخانے کا کہنا ہے کہ سفر کے خواہاں پاکستانی اپنی اپائنٹمنٹ منسوخ کرکے دوبارہ شیڈول کرسکتے ہیں، دوبارہ شیڈول کی اضافی رعایت کراچی قونصل خانہ یا اسلام آباد سفارتخانہ سے لے سکتے ہیں۔ درخواست گزاروں کیلئے تاریخ، وقت اور انٹرویو کی جگہ کا تعین کرنے میں آسانی ہوگی، 25ستمبر سے کراچی میں انٹرویو سے مستثنی امیدواروں کی درخواستیں قبول کی جارہی ہیں۔