اسلام آباد (نوائے وقت رپورٹ) وزیر نجکاری فواد حسن فواد نے کہا کہ جب تک مینڈیٹ ہے نجکاری کے عمل کو آگے بڑھائیں گے۔ فواد حسن فواد نے میڈیا سے گفتگو کرتے ہوئے کہا ہمارا کام نجکاری کرنا ہے کسی ادارے کو بند کرنا نہیں، کسی بھی ملازم کو نگران حکومت فارغ نہیں کرے گی، نگران حکومت میں قابلیت کی بنیاد پربیٹھا ہوں، سول سرونٹ ہوں، میرا کسی سیاسی جماعت سے تعلق نہیں۔ وزیر نجکاری نے کہا سٹیل ملز کی نجکاری اس وقت پاکستان کی ضرورت ہے، جو ادارے نقصان کا باعث بن رہے ان کی نجکاری کر دی جائے گی، رضا ربانی کے تحفظات کو دور کرنے کی کوشش کروں گا، کوئی بھی چیز آئین و قانون سے باہر نہیں ہونے جارہی، نگران حکومت اپنے مینڈیٹ کے باہر کوئی کام نہیں کرے گی۔ فواد حسن فواد نے مزید کہا نجکاری کا کوئی منصوبہ نگران حکومت نے شروع نہیں کیا، نجکاری کا عمل گزشتہ حکومتوں میں شروع ہوا، نگران وزیرخزانہ کی مدد سے 48 گھنٹے میں پی آئی اے کے لئے پیسوں کا انتظام کیا، نگران حکومت کے اقدامات سے پی آئی اے کا آپریشن رواں دواں ہے، وہی حکومت سبسڈی دے سکتی ہے جس کو خسارے کا سامنا نہ ہو، خسارے سے مہنگائی اور عام آدمی پر بوجھ پڑتا ہے، اگر حکومت کے خسارے میں اضافہ ہوگا تو عام آدمی پر بوجھ پڑے گا۔ وزیر نجکاری نے مزید کہا گزشتہ حکومت نے نگران حکومت کے مینڈیٹ میں آئینی طریقے سے اختیارات میں توسیع کی تھی، یہاں تک سنا ہے تین ماہ کے اندر پی آئی اے کو بند کر دیا جائے گا، نجکاری کے عمل میں ہر مرحلے کے لئے ٹائم لائن ہے۔