اسلام آباد (نوائے وقت رپورٹ) صدر مملکت ڈاکٹر عارف علوی نے سکھ رہنما کے قتل کی مذمت کرتے ہوئے دنیا سے اپیل کی وہ اس بہیمانہ قتل کا سنجیدگی سے نوٹس لے۔ صدر مملکت نے کینیڈا میں سکھ رہنما کے قتل پر تشویش کا اظہار کرتے ہوئے کہا بھارت اور بھارت سے باہر اقلیتی گروہوں کی قیادت پر ظلم کرنا اور ا±نہیں ختم کرنا بھارت کی پالیسی رہی ہے۔ سکھ رہنما کے بہیمانہ قتل نے بھارت کا اصل چہرہ بے نقاب کر دیا۔ بھارت اقلیتی گروہوں کے خلاف عدم برداشت کا مظاہرہ کرتا آیا ہے۔ ڈاکٹر عارف علوی نے کہا بھارت کئی دہائیوں سے مقبوضہ جموں و کشمیر کے مسلمانوں اور دیگر اقلیتیوں کے خلاف دہشت گردی جاری رکھے ہوئے ہے، کشمیریوں اور اقلیتوں پر ظلم، عبادت گاہوں کو مسمار کرنے پر دنیا کی خاموشی نے بھارت کو غیر ملکیوں پر ایسی کارروائیوں کا حوصلہ دیا، یہ ایک کھلا راز ہے کہ بھارت ہمسایہ ممالک کی سرزمین کو پاکستان کے خلاف استعمال کرتا رہا ہے۔ صدر مملکت نے مزید کہا بھارت فالس فلیگ آپریشنز، پاکستان میں دہشت گردی کی کارروائیوں کے لئے عسکریت پسندوں کی تربیت کرتا ہے۔ فنڈنگ اور مدد سے خطے میں مسائل اور عدم استحکام کا سب سے بڑا باعث ہے۔ افسوس کہ دنیا ایسی باتوں پر خاموش رہنے کا انتخاب کرتی ہے۔