لاہور(سپورٹس رپورٹر) چیرمین سینیٹ نے ورلڈ ایتھلیکٹس چیمپین شپ میں ملک کا نام روشن کرنے پر ارشد ندیم کو دس لاکھ روپے کا چیک دے دیا۔ چئیرمین سینیٹ صادق سنجرانی سے قومی جیولن ہیرو ارشد ندیم نے ملاقات کی۔ پارلیمنٹ ہاوس میں ہوئی ملاقات میں چئیرمین سینیٹ نے ارشد ندیم کو ورلڈ ایتھلیٹیکس چیمپئن شپ میں سلور میڈل جیتنے پر مبارک باد دیتے ہوئے کہا کہ کامن ویلتھ گیمز اور حالیہ ورلڈ ایتھلیٹیکس چیمپئن شپ میں ارشد ندیم کی کارکردگی انتہای شاندار رہی۔ صادق سنجرانی نے کہا کہ ارشد ندیم نے اپنی بے مثال کارکردگی کی بدولت پاکستان کا نام روشن کیا، آپ جیسے لوگ پاکستان کا فخر، قومی ہیرو ہیں، اپنی محنت جاری رکھیں اور پاکستان کا نام مزید روشن کریں، ہم آپ کی معاونت کیلئے تیار ہیں۔ چیرمین سینیٹ نے کہا کہ کھیلوں کے فروغ کے لیے ٹیلنٹ کو نکھارنے کی ضرورت ہے، چئیرمین سینیٹ نے ارشد ندیم کو برینڈ ایمبیسیڈر بنانے اور ان کی سپانسر شپ کیلئے نجی شعبے سے بات کرنے کے عزم کا اظہار کیا۔ قومی ایتھلیٹ ارشد ندیم نے اس مقام تک پہنچنے کیلئے اپنی جدوجہد کے بارے میں چئیرمین سینیٹ کو آگاہ کیا۔