لاہور(سپورٹس رپورٹر)جنوبی فریقہ کی ٹیم ورلڈ کپ 2023 کی مہم سر کرنے کیلئے ٹیمبا باوما کی قیادت میں بھارت کیلئے روانہ ہو گئی ہے۔ 5 اکتوبر سے بھارت میں شروع ہونے والے کرکٹ کے سب سے بڑے میلے میں شرکت کیلئے کرکٹ ٹیمیں بھارت کا رخ کر رہی ہیں۔ 5 بار کی عالمی چیمپئن آسٹریلیا پہلے ہی وہاں پہنچ چکی ہے۔اب جنوبی افریقہ نے رخت سفر باندھ لیا۔پروٹیز ٹیم کے ارکان کا بھارت روانگی سے قبل گروپ فوٹو سیشن ہوا جس میں کھلاڑیوں نے اپنے گلے میں جنوبی افریقی جھنڈے کے سکارف پہن رکھے تھے۔بھارت روانگی سے قبل قائد جنوبی افریقہ ٹیمبا نے کہا کہ ٹورنامنٹ میں اپنی کارکردگی اور پیشرفت کیلئے پرامید ہیں اور ٹیم ورلڈ کپ میں اچھی کارکردگی کا مظاہرہ کرنے کی کوشش کرے گی۔