مریم نواز واپس آگئیں، پارٹی قائد کے استقبال کیلئے خصوصی ٹاسک مل گیا
لاہور (خبر نگار+نوائے وقت رپورٹ) مسلم لیگ (ن) کی چیف آرگنائزر مریم نواز لندن سے واپس وطن پہنچ گئیں۔ لاہور ائر پورٹ پر لیگی کارکنوں نے مریم نواز کا استقبال کیا۔ مریم نواز اہم پارٹی میٹنگز میں شرکت کیلئے چند روز قبل لندن گئی تھیں۔ علاوہ ازیں نواز شریف کی وطن واپسی پر استقبال کی تیاریاں حتمی مراحل میں داخل ہو گئیں۔ پارٹی قیادت نے مسلم لیگ کی چیف آرگنائزر و سینئر نائب صدر مریم نواز کو خصوصی ٹاسک سونپ دیئے۔ ذرائع کے مطابق پارٹی کی جانب سے نواز شریف کے استقبال میں خواتین کو ہراول دستہ کا کردار دینے کا فیصلہ کیا گیا ہے۔ پارٹی کی اعلیٰ قیادت نے مریم نواز کو خواتین کے حوالے سے خصوصی ٹاسک سونپ دئیے۔ مریم نواز پارٹی کی خواتین ونگ کو فوری طور پر مزید فعال اور متحرک کریں گی۔ مریم نواز لندن سے واپسی پر خواتین ونگ کے ساتھ خصوصی اجلاس کریں گی۔ پارٹی قیادت نے فیصلہ کیا ہے کہ گزشتہ انتخابات میں مخصوص نشستوں پر منتخب ہونے والی خواتین رہنماو¿ں کو خصوصی ٹاسک سونپے جائیں گے۔ خواتین رہنما اپنے اپنے علاقوں میں گھریلو اور خصوصاً نوجوان خواتین تک پارٹی کا پیغام پہنچائیں گی۔ پارٹی ذرائع کے مطابق نواز شریف کے استقبال کے حوالے سے دیئے گئے ٹاسک پورے کرنے والی خواتین رہنماو¿ں کو آئندہ عام انتخابات میں مخصوص نشستوں کے لئے نامزد کیا جائے گا۔ گزشتہ 5 سال کے دوران پارٹی کے لئے مار کھانے والی خواتین کو مخصوص نشستوں کے لئے نامزدگی میں ترجیح دی جائے گی۔
