فیصل آبادجڑانوالہ (نمائندہ خصوصی+ نمائندہ نوائے وقت) ستیانہ روڈ تاندلیانوالہ روڑ پر ڈمپر کی مسافر وین کو ٹکر جس کے نتیجے میں 4 افراد جاں بحق جبکہ 9 افراد شدید زخمی ہوئے ۔ تھانہ ستیانہ کی حدود میں مسافر ویگن تاندلیانوالہ سے فیصل آباد جا رہی تھی، چمڑیل جھال کے قریب مخالف سمت سے آنے والے ڈمپر نے مسافر وین کو ٹکر مار دی۔ پولیس ذرائع کے مطابق جس کے نتیجے میں محمد حسین رانا جمیل کانسٹیبل، محمد منیر اور شفیق 4 افراد موقع پر جاں بحق ہو گئے جبکہ زخمی ہونے والوں میں پولیس کے جوان محمد عباس، ولی جوئیہ اور حق نواز کھرل سمیت 9 افراد شدید زخمی ہو گئے۔ ریسکیو 1122 نے زخمیوں کو تحصیل ہیڈ کوارٹر ہسپتال تاندلیانوالہ، ستیانہ ہسپتال جبکہ شدید زخمیوں کو فیصل آباد الائیڈ ہسپتال منتقل کر دیا گیا۔ حادثہ اس قدر شدید تھا کہ وین بری طرح تباہ ہو گئی اور لاشیں سڑک پر بکھر گئیں ۔ مسافر وین میں موجود پولیس جوان لوئر کلاس کورس کے لئے جا رہے تھے۔ حادثہ میں ڈمپر ڈرائیور بھی زخمی ہوا ہے۔ جبکہ جھنگ روڈ پر مزدا ٹرک کی ٹکر سے موٹر سائیکل سوار اٹھارہ سالہ علی حسن موقع پر جاں بحق ہو گیا اور اس کا ساتھی یاسر شدید زخمی ہو گیا۔