لاہور(سپورٹس رپورٹر)ایشین گیمز مینز ٹیم اسکواش میں پاکستان بھارت کودو ایک سے شکست دےکر سیمی فائنل میں پہنچ گیا۔بھارت کےخلاف میچ میں پاکستان کی جانب سے ناصر اقبال اور نور زمان نے اپنے میچز جیتے۔چین میں جاری ایشین گیمز سکواش میں پاکستان اور بھارت کے درمیان مقابلہ سنسنی خیز رہا، پہلے معرکے کیلئے پاکستان کے نور زمان اور بھارت کے ابھے سنگھ آمنے سامنے ہوئے۔ 51 منٹ تک جاری رہنے والا یہ مقابلہ نور زمان نے تین ایک سے جیتا، ان کی کامیابی کا سکور 8-11، 12-10، 8-11 اور 8-11 رہا۔دوسرے معرکے میں عاصم خان اور ساروو گھوشال آمنے سامنے تھے، بھارتی پلیئر نے عاصم کے خلاف تین صفر سے کامیابی حاصل کی۔عاصم کے خلاف ساروو کی فتح کے ساتھ مقابلہ ایک۔ ایک برابر ہوا، جس کے بعد فیصلہ کن معرکے میں ناصر اقبال نے مہیش منگونکر کو شکست دی۔ناصر اور مہیش کے درمیان میچ 58 منٹ تک جاری رہا جس میں پاکستانی پلیئر نے تین ایک سے کامیابی حاصل کی۔فیصلہ کن معرے میں ناصر کی کامیابی کا سکور 6-11، 11-13، 11-9 اور 8-11 رہا۔اس سے قبل پاکستان نے سنگاپور کو بھی تین صفر سے شکست دی تھی۔نیپال اور قطر کے خلاف مقابلے جیتے تھے۔آخری گروپ میچ میں پاکستان آج کویت سے مقابلہ کرےگا۔