لاہور(سپورٹس رپورٹر)ایشین گیمز کرکٹ میں نیپال نے ٹی ٹوئنٹی فارمیٹ میں متعدد ریکارڈز بنا ڈالے،نیپال نے ٹی ٹونٹی کرکٹ میں سب سے زیادہ رنز بنانے کا ورلڈ ریکارڈ قائم کیا اور منگولیا کے خلاف پہلے بیٹنگ کرتے ہوئے 3وکٹوں پر 314رنز بنائے۔ نیپالی ٹیم کے کوشال مالا نے 34گیندوں پر ناقابلِ شکست 137رنز بنائے جبکہ دیپندرہ سنگھ نے 9گیندوں پر ناقابلِ شکست 50رنز بنائے، کپتان روہت پاڈل نے بھی 27گیندوں پر 61رنز سکور کیے،اس سے قبل ٹی ٹونٹی فارمیٹ میں افغانستان کا سب سے زیادہ رنز بنانے کا ریکارڈ تھا،افغانستان نے فروری 2019میں آئر لینڈ کےخلاف میچ میں 3وکٹوں پر 278رنز بنائے تھے،نیپال کے دیپندرہ سنگھ نے بھارت کے یووراج سنگھ کا تیز ترین ففٹی کا ریکارڈ توڑا، یووراج سنگھ نے 2007کے ورلڈ کپ میں انگلینڈکےخلاف 12گیندوں پر نصف سنچری بنائی تھی لیکن دیپندرہ سنگھ نے صرف 9گیندوں پر 50رنز بنائے،کوشال مالا نے تیز ترین سنچری بنا کر بھارت کے روہت شرما اور جنوبی افریقہ کے ڈیوڈ ملر کو پیچھے چھوڑ دیا،کوشال مالا نے 34گیندوں پر سنچری بنائی جبکہ روہت شرما اور ڈیوڈ ملر نے 35گیندوں پر سنچری بنائی تھی۔