ورلڈ کپ کرکٹ میلہ آج سے بھارت میں شروع، پاکستان افتتاحی میچ کل کھیلے گا
لاہور(سپورٹس رپورٹر)انٹرنیشنل کرکٹ کونسل کے زیر اہتمام مینز ورلڈ کپ کے 13ویں ایدیشن کا آغازآج سے بھارت میں ہوگا۔افتتاحی میچ دفاعی چیمپئن انگلینڈ اور نیوزی لینڈ کے درمیان احمد آباد میں دن ڈیڑھ بجے کھیلا جائےگا۔ افتتاحی تقریب منسوخ ہونے کے بعد پاکستان کرکٹ ٹیم کے کپتان بابر اعظم ورلڈکپ کیپٹنز ڈے میں شرکت کیلئے حیدر آباد سے خصوصی طیارے کے ذریعے احمد آباد پہنچے۔پاکستان کرکٹ ٹیم حیدر آباد میں موجود ہے جہاں قومی ٹیم اپنا پہلا میچ کل نیدر لینڈ کےخلاف کھیلے گی۔پاکستان کرکٹ ٹیم کا دوسرا میچ بھی حیدر آباد میں ہی سری لنکا کےخلاف 10 اکتوبر کو شیڈول ہے۔کیپٹنز ڈے کی مناسبت سے ہونے والی تقریب میں سب سے پہلے افغانستان اور نیدر لینڈز کے کپتانوں کو سٹیج پر بلایا گیا۔کپتان افغان کرکٹ ٹیم حشمت اللہ نے کہا کہ نروس نہیں پرجوش ہوں، ورلڈ کپ کو انجوائے کروں گا۔سری لنکا اور بنگلا دیش کے کپتانوں کو ایک ساتھ سٹیج پر بلایا گیا اور دونوں کپتانوں کا کہنا تھا ہم آپس میں دوست ہیں حریف نہیں ہیں۔جنوبی افریقہ اور آسٹریلیا کے کپتانوں کو ایک ساتھ سٹیج پر بلایا گیا۔آسٹریلوی کپتان پیٹ کمنز کا کہنا تھا ورلڈ کپ کے منتظر ہیں، بھارت میں کرکٹ فینز بہت زیادہ ہوتے ہیں اور شور ہوتا ہے جبکہ جنوبی افریقی کپتان ٹمبا باووما کا کہنا تھا بھارت میں کھیلنے کا تجربہ ہے۔پاکستان کے کپتان بابر اعظم اور میزبان ٹیم بھارت کے کپتان روہت شرما ایک ساتھ سٹیج پر آئے۔بابر اعظم کا کہنا تھا ہمیں بالکل بھی نہیں لگا کہ ہم بھارت میں ہیں، ہمیں ایسا لگا کہ ہم اپنے ہی ملک میں ہیں، ہم ایسے شاندار استقبال کی توقع نہیں کر رہے تھے، حیدر آباد میں ہمارا بہت ہی زبردست استقبال ہوا، ہم ورلڈ کپ میں 100 فیصد دیں گے اور اس کیلئے محنت کی ہے۔بھارتی ٹیم کے کپتان روہت شرما کا کہنا تھا بھارتی ٹیم کی قیادت کرنا فخر کی بات ہے اور ورلڈکپ جیتنے کیلئے ہر وہ چیز کریں گے جو کر سکتے ہیں۔میزبان ٹیم کے ماضی میں جیتنے کے بارے میں نہیں سوچ رہا، ورلڈکپ ٹف ٹورنامنٹ ہوگا، انجوائے کریں گے۔پاکستان کرکٹ ٹیم کے قائد بابر اعظم نے کہا کہ ورلڈ کپ کیلئے اچھی تیاری کی ہے لیکن میگا ایونٹ میں کسی بھی ٹیم کو آسان نہیں لے سکتے۔ دونوں وارم اپ میچوں سے اچھی پریکٹس ملی ہے۔ کسی بھی ٹورنامنٹ کا افتتاحی میچ جیتنا بہت اہم ہوتا ہے۔ ہر میچ میں پہلی بال سے جیت کے لیے جائیں گے۔انہوں نے نیدر لینڈ کی ٹیم کو ورلڈ کپ کھیلنے پر مبارکباد پیش کرتے ہوئے کہا کہ نیدر لینڈ ٹیم بہت اچھی ٹیم ہے جو کوالیفائنگ راﺅنڈ میں بہترین کرکٹ کھیل کر آئی ہے۔
