بہاولپور‘ رحیم یارخان (نوائے وقت رپورٹ) سابق سپیکر قومی اسمبلی سردار ایاز صادق نے کہا کہ مسلم لیگ ن کے قائد کی آمد پر پیپلز پارٹی کے چیئرمین بلاول بھٹو زرداری کو بھی دعوت دیں گے۔ لیگی کنونشن سے خطاب کرتے ہوئے کہا کہ جنوری کے آخر میں یا فروری کے شروع میں الیکشن ہوں گے، آئین میں کوئی اور طریقہ نہیں ہے کہ الیکشن میں تاخیر کی جائے۔ نواز شریف 21 اکتوبر کو لازمی ملک پہنچیں گے۔ 21 اکتوبر کو نواز شریف کا شاندار استقبال کیا جائے گا۔ استقبال کیلئے لوگ زیادہ ہیں اور ٹرانسپورٹ کم، جو اتحاد بنا تھا اس میں مختلف سیاسی جماعتیں اور ان کے اپنے اپنے نظریات تھے۔ پاکستان کو اتحاد اور اکٹھا ہونے کی ضرورت ہے۔ جنہوں نے مہنگائی کی صورتحال پیدا کی وہ تو چھپے ہوئے ہیں، نظر نہیں آ رہے لیکن آنے والی حکومت کو بہت سارے چیلنجز کا سامنا کرنا پڑے گا۔ 9 مئی کا واقعہ ایسا واقعہ ہے جو بھارت بھی پاکستان کے خلاف نہیں کر سکا ہم نے مارچ 2022ءمیں صرف اور صرف پاکستان کو بچانے کیلئے اقتدار لیا تھا۔ سیاسی اتحاد کے ساتھ اقتدار حاصل کیا اور پاکستان کی مشکلات کے خاتمے کیلئے کام کیا۔