لاہور(نامہ نگار)گلشن راوی کے علاقے میں مبینہ پولیس مقابلے میں ڈکیتی اورچوری کے 39 مقدمات میں ریکارڈیافتہ ڈاکو زخمی ہو گیا۔پولیس کے مطابق ملزم شہروز کو گلشن راوی پولیس ٹیم ڈکیتی کے مقدمہ میں برآمدگی کیلئے جا رہی تھی کہ ایچ بلاک پلی گلشن راوی کے نزدیک ملزم کے ساتھیوں نے پولیس ٹیم پر فائرنگ کر دی۔ ملزمان کی فائرنگ سے شہروز زخمی ہو گیا جبکہ ملزمان فرار ہوگئے ہیں۔زخمی ملزم کو ہسپتال منتقل کر دیا گیا ہے جبکہ فرار ہونے والے ملزمان کی تلاش کےلئے ناکہ بندی اور سرچ آپریشن کئے جا رہے ہیں۔ فائرنگ کرنے والے ملزمان جلد قانون کی گرفت میں ہوں گے۔