اسلام آباد (نیٹ نیوز) دنیا کے مختلف علاقوں میں رواں سال کے دوسرے اور آخری سورج گرہن کا نظارہ کیا گیا۔ محکمہ موسمیات کے مطابق پاکستانی وقت کے مطابق رات 8 بج کر4 منٹ پر سورج گرہن کا آغاز ہوا، سورج گرہن پاکستانی وقت کے مطابق رات 10 بج کر 59 منٹ پر عروج پر آگیا۔ محکمہ موسمیات کے مطابق سورج گرہن جنوب مغربی میکسیکو، وسطی امریکا کے مختلف ملکوں، جنوبی افریقا، جنوبی آسٹریلیا، بحر اوقیانوس، بحرالکاہل، انٹارکٹیکا اور بحرہندکے علاقوں میں دیکھا گیا ۔ محکمہ موسمیات کا کہنا ہے کہ سورج گرہن کا اختتام آج 15 اکتوبر کی شب 1 بج کر 55 منٹ پر ہوگا۔ سورج گرہن کو رنگ آف فائر کا نام دیا گیا ہے، یہ رواں سال کا آخری اور مکمل سورج گرہن ہے۔ ماہرین فلکیات کے مطابق اس سورج گرہن کو رنگ آف فائر کا نام اس لیے دیا گیا ہے کیونکہ اس دوران چاند سورج کو اپنے پیچھے مکمل چھپا نہیں سکے گا، اس لیے سورج کا بیرونی حصہ ایسے دکھائی دے گا جیسے کوئی آگ کا چھلا ہو۔سورج گرہن کا نظارہ پاکستان میں نہیں کیا جا سکا۔ رواں سال کا دوسرا چاند گرہن 28 اکتوبر کو ہوگا۔محکمہ موسمیات کا کہنا ہے پاکستانی وقت کے مطابق چاند گرہن کا آغاز رات 11 بج کر 2 منٹ پر ہوگا، چاند کو مکمل گرہن رات 1 بج کر 14 منٹ پر لگے گا جبکہ اختتام 29 اکتوبر رات 3 بج کر 26 منٹ پر ہوگا۔