لاہور(سپورٹس رپورٹر)لاہورپاکستان کرکٹ بورڈ نے کھلاڑیوں کو دیے گئے سنٹرل کنٹریکٹس کا بغور جائزہ لینے کے بعد اس میں مزید پانچ کرکٹرز کو شامل کرنے کا فیصلہ کیا ہے ‘ کرکٹرز کی تعداد 30 ہوگئی ہے۔ 25 کرکٹرز کی پچھلی لسٹ کو نجم سیٹھی کی سربراہی میں قائم مینجمنٹ کمیٹی نے منظور کیا تھا لیکن ذکاءاشرف کی سربراہی میں قائم نئی مینجمنٹ کمیٹی نے اس فہرست کا دوبارہ جائزہ لینے کا فیصلہ کیا جس کی روشنی میں پانچ مزید کرکٹرز کو اس میں شامل کیا گیا ہے۔ کرکٹرز کو تین سال کیلئے کنٹریکٹس دیئے گئے ہیں جو یکم جولائی 2023 سے 30 جون 2026 تک کیلئے ہیں۔سنٹرل کنٹریکٹس میں جن پانچ کرکٹرز کا اضافہ کیا گیا ہے ان میں ابرار احمد ( سی کیٹگری ) نعمان علی ( سی کیٹگری ) طیب طاہر ( ڈی کیٹگری ) عامر جمال ( ڈی کیٹگری) اور ارشد اقبال ( ڈی کیٹگری شامل ہیں۔پاکستان کرکٹ بورڈ نے سابق کپتان سرفراز احمد کی کیٹگری تبدیل کرتے ہوئے ڈی سے بی کردی ہے۔عامر جمال‘ ارشد اقبال اور طیب طاہر قومی سلیکشن کمیٹی کے پلان میں شامل ہیں۔