گوجرانوالہ (نمائندہ خصوصی) شہباز شریف نے کہا ہے کہ گوجرانوالہ مسلم لیگ ن کا قلعہ ہے اور ایک بار پھر گوجرانوالہ کے شیروں نے ہزاروں کی تعداد میں لاہور جلسہ میں شرکت کر کے ثابت کیا کہ وہ نواز شریف سے بے پناہ محبت کرتے ہیں۔ ان خیالات کا اظہار سابق وزیر اعظم نے راہنما مسلم لیگ ن احسن ڈار سے گفتگو میں کیا انہوں نے کہا کہ نواز شریف جلد گوجرانوالہ کا دورہ کریں گے۔ گوجرانوالہ کا دیرینہ مطالبہ موٹروے لنک منصوبے کی تکمیل تیزی سے جاری ہے۔ انجینرنگ یونیورسٹی سے گوجرانوالہ اور اس کے جواں شہر مستفید ہونگے۔ راہنما ن لیگ احسن ڈار نے شہباز شریف کی توجہ چلڈرن ہسپتال کی جانب دلوائی اور بتایا کہ گوجرانوالہ میں چلڈرن ہسپتال نہ ہونے کی وجہ سے لوگوں کو لاہور جانا پٹرتا ہے جس پر شہباز شریف نے وعدہ کیا کہ ڈار صاحب ہماری حکومت آئی اور اگر اللہ کو منظور ہوا تو نواز شریف کی قیادت میں گوجرانوالہ میں چلڈرن ہسپتال بھی بنائیں گے۔ نواز شریف کی قیادت میں ملک کو بحرانوں سے نکالیں گے۔ پی ٹی آئی دور میں سرکاری سوشل میڈیا ٹیمز کے ذریعے اداروں کیخلاف پراپیگنڈا کیا گیا جس سے ملک کو ناقابل تلافی نعقصان پہنچا، انہوں نے کہا کہ ریاست کیخلاف پراپیگنڈہ کرنے والے اپنے انجام کو پہنچیں گے۔