اوکاڑہ‘ نوشہرہ‘ حضرو (نامہ نگار‘ نوائے وقت رپورٹ‘ نمائندہ نوائے وقت) مختلف حادثات میں خواتین سمیت 7افراد جاں بحق اور 33زخمی ہوگئے۔ اوکاڑہ بد قسمت فیملی کی کار درخت سے ٹکرا گئی، میاں بیوی جاں بحق اور ماں بیٹا شدید زخمی ہوگئے۔ حادثہ اچانک ٹائر برسٹ ہونے سے پیش آیا، چوہدری کالونی اوکاڑہ کی رہائشی بد قسمت فیملی ایک کارنمبری LEA-6185 میں سوار سکندر روڈ اوکاڑہ پر جارہی تھی۔ عبدالرزاق اس کی بیوی شفقت بی بی موقع پر ہی جاں بحق ہو گئے نازیہ زوجہ شعیب اور اس کا 8 سالہ بیٹا شدید زخمی ہو گئے۔ نوشہرہ میں پشاور اسلام آباد موٹر وے پر ولی انٹر چینج کے قریب کار الٹ گئی۔ پولیس کے مطابق حادثے میں تین خواتین جاں بحق ہو گئیں جبکہ 5 بچوں سمیت 6 افراد زخمی بھی ہوئے جن کو طبی امداد کیلئے ہسپتال منتقل کر دیا گیا ہے۔ ہٹیاں کے قریب افغانستان فیملیز کو لے کر جانے والا 10 ویلر ٹرک تیز رفتاری کے باعث الث گیا‘ دو افراد جاں بحق اور 26 شدید زخمی ہو گئے۔ زخمیوں کو سول ہسپتال حضرو اٹک اور راولپنڈی ریفر کر دیا گیا۔ اسسٹنٹ کمشنر حضرو کامران اشرف واقعے کی اطلاع ملتے ہی سول ہسپتال پہنچ گئے‘ زخمیوں کے علاج معالجہ کرنے اور ان کو کھانا اور دیگر اشیاءفراہم کرنے کی بھی ہدایت کی۔