اسلام آباد (خبرنگارخصوصی) پاکستان نیول اکیڈمی کراچی میں چوتھے بین الاقوامی ناٹیکل مقابلوں کا آغاز ہوگیا۔ ان مقابلوں کا انعقاد 3 نومبر تک کیا جا رہا ہے۔ ترجمان پاک بحریہ کے مطابق کمانڈنٹ پاکستان نیول اکیڈمی کموڈور محمد خالد نے تقریب میں بطور مہمان خصوصی شرکت کی۔ اس سال اِن مقابلوں میں آج تک کی سب سے زیادہ شمولیت ہوگی، جس میں آذربائیجان، چین، انڈونیشیا، اٹلی، سعودی عرب، عمان،ترکیہ اور پی این اے کی میزبان ٹیمیں حصہ لے رہی ہیں۔ ان مقابلوں میں کشتی رانی، تیراکی، سمندر میں جان بچانے اور سی مین شپ کے مقابلے شامل ہیں جن کا مقصد سیلر کی قدیم پیشہ ورانہ مہارتوں کو برقرار رکھنا اور مختلف ممالک کے نیول افسران کے مابین صحت مند مقابلے کو فروغ دینا ہے۔ پاک بحریہ 2015 سے ہر دو سال کے بعد بین الاقوامی ناٹیکل مقا بلے (INC) کی میزبانی کر رہی ہے۔ ان مقابلوں کا مقصد دوست ممالک کے درمیان خیر سگالی کو فروغ دینا ہے۔