لاہور (نوائے وقت رپورٹ) مسلم لیگ (ن) کے نائب صدر و سابق وزیراعلیٰ پنجاب حمزہ شہباز نے میڈیا سے گفتگو کرتے ہوئے کہا ہے ملک بڑے مشکل حالات سے گزر رہا ہے۔ ملک میں مہنگائی آسمان کو چھو رہی ہے۔ پاکستانی عوام نے ہمیشہ مشکل حالات کا ڈٹ کر مقابلہ کیا ہے۔ سیلاب ہو یا دہشت گردی‘ ہم نے مل کر مقابلہ کیا۔ مسلم لیگ (ن) کوجب بھی موقع ملا ملکی معیشت کی بہتری کیلئے کام کیا۔ آئندہ انتخابات میں قوم نے موقع دیا تو نواز شریف کی قیادت میں ملک دوبارہ ترقی کی راہ پر گامزن کریں گے۔ اپنے وزارت اعلیٰ کے دور میں پنجاب کے 12 کروڑ سستا آٹا فراہم کیا اور 100 یونٹ تک فری بجلی کا منصوبہ تیار ہو چکا تھا۔ انہوں نے کہا پاکستانی افواج نے ملک کو امن کا گہوارہ بنانے کیلئے اپنی جانوں کا نذرانہ پیش کیا۔ دہشت گردی کے خلاف جنگ میں پوری قوم افواج پاکستان کے ساتھ کھڑی ہے۔ ہمارے دل اپنے فلسطینی بھائیوںکے ساتھ دھڑکتے ہیں۔ اقوام عالم مسئلہ فلسطین حل کرنے کیلئے اپنا کردار ادا کرے۔