ڈیفنس، 2گاڑیوں میں تصادم، ایک خاندان کے 6افراد جاں بحق، فیصل آباد میں بس کی ٹکر، 5مارے گئے
لاہور‘ فیصل آباد ‘جڑانوالہ‘سانگلہ ہل(نامہ نگار ‘نمائندہ خصوصی‘نمائندہ نوائے وقت) مختلف حادثات میں 11افراد جاں بحق اور10زخمی ہوگئے لاہور ڈیفنس میں دو تیز رفتار گاڑیوں کے درمیان خوفناک تصادم کے نتیجے میں ایک ہی خاندان کے 6 افراد جاں بحق ہو گئے ۔ مرنے والوں میں رخسانہ،اس کا بیٹا حسنین،بہو عائشہ،4 ماہ کا پوتا حذیفہ،30 سالہ داماد سجاد اور 4 سالہ نواسی انابیہ شامل ہیں۔تفصیلات کے مطابق شاداب کالونی فیروز پور روڈ کا رہائشی رفاقت علی اپنی فیملی کے ہمراہ بیٹی کے سسرال ڈی ایچ اے فیز سیون سے واپس گھرآرہا تھا کہ راستے میں کم عمر کار سوار نے ان کی گاڑی کو ٹکر ماردی ۔پولیس نے گرفتار ڈرائیور افنان شفقت کے خلاف مقدمہ درج کر کے تفتیش شروع کردی ہے۔فیصل آباد کھرڑیانوالہ کے قریب تیز رفتار مسافر بس ‘کار اور ٹریکٹر سے ٹکراگئی جس کے نتیجے میں 5افراد جاں بحق جبکہ10 زخمی ہوگئے۔ حادثے کی اطلاع ملتے ہی ریسکیو ٹیمیں موقع پر پہنچ گئیں اور نعشوں اور زخمیوں کو ہسپتال منتقل کر دیا ۔ ریسکیو کے مطابق جاں بحق افراد میں 4 کار سوار اور ایک ٹریکٹر ڈرائیورشامل ہے۔
