اوکاڑہ؍ رینالہ خورد (نامہ نگار+ نمائندہ خصوصی) اوکاڑہ بچوں کو تعلیمی اداروں میں لے جانے والی سوزوکی وین کو ٹرالر نے ٹکر مار دی۔ ایک طالبہ موقع پر جاں بحق، زخمی ڈرائیور دوران علاج ہسپتال میں دم توڑ گیا۔ 8 سٹوڈنٹس شدید زخمی، 3 کی حالت تشویشناک۔ ریسکیو نے زخمیوں کو ہسپتالوں میں منتقل کر دیا بتایا گیا ہے کہ سوزوکی وین نمبرسٹوڈنٹس کو ان کے تعلیمی اداروں میں لے جا رہی تھی۔ وین چک نمبر 2 ون ایل کے قریب پہنچی تو مخالف سمت سے آنے والے  تیز رفتار ٹرالر نے  ٹکر مار دی جس کے نتیجے میں ایک طالبہ 16 سالہ آرزو موقع پر ہی جاں بحق ہوگئی۔ ڈرائیور کی شناخت وقاص کے نام سے ہوئی۔ 9 سٹوڈنٹس 17 سالہ مومنہ،  17 سالہ صباء،  18 سالہ اقراء ، 18 سالہ صائمہ،  17 سالہ سویرا،  8 سالہ سبی کا 20 سالہ فائزہ اور 15 سالہ فیضان شدید زخمی ہوگئے۔ حادثہ ہوتے ہی ٹرک ڈرائیور موقع سے فرار ہو گیا۔ جاں بحق ہونے والی طالبہ اور زخمیوں کو رینالہ اور ڈسٹرکٹ ہسپتال اوکاڑہ منتقل کر دیا۔