عوام سے بات ہو گئی، آئندہ وزیراعظم بلاول ہی ہونگے: پرویز اشرف
وزیر آباد+قلعہ دیدار سنگھ+لدھیوالہ وڑائچ (نامہ نگار+نمائندہ خصوصی) سپیکر قومی اسمبلی و سابق وزیر اعظم راجہ پرویز اشرف نے کہا چیئرمین بلاول بھٹو انتخابی مہم کے حوالے سے پنجاب آ رہے ہیں۔ چیف جسٹس نے فروری میں جنرل الیکشن کی یقین دہانی کرائی ہے۔ تمام جیالوں کو دعوت دیتا ہوں کہ بھرپور انداز میں چیئرمین بلاول بھٹو کے استقبال کی تیاریاں کریں۔ ان خیالات کا اظہار انہوں نے صوبائی نائب صدر پیپلز پارٹی اعجاز احمد سماں رہائش گاہ پر پارٹی کارکنان و عہدیداران سے خطاب کرتے ہوئے کیا۔ اس موقع پر امتیاز صفدر وڑائچ ، ملک طاہر اختر، اعجاز احمد چیمہ ایڈووکیٹ، ارشاد اللہ سندھو، صدام انور چیمہ ایڈووکیٹ، نعیم گوندل، سرفراز ساہی، عامر مغل، سہیل افضل، غلام مصطفی تبسم، ذوالفقار میر، فیصل چیمہ ایڈووکیٹ سمیت دیگر بھی موجود تھے۔ راجہ پرویز اشرف نے ذوالفقار علی بھٹو اور بے نظیر شہید کا بڑھ چڑھ کر ساتھ دیا۔ پیپلز پارٹی کا ووٹ ہر جگہ موجود ہے آواز دینے والا تگڑا ہونا چاہیے۔ جلسہ گاہ جہاں بھی بنے آپ سب نے شرکت کرتی ہے تو بلاول کے لئے جلسہ گاہ کا ایک دو روز میں تعین ہو جائے گا یہ بھی یاد رکھیں کہ ہماری بات بھی پاکستانی عوام سے ہو گئی ہے۔ بلاول بھٹو زرداری آئندہ وزیر اعظم ہونگے۔ اس موقع پر سابق وفاقی وزیر امتیاز صفدر وڑائچ، اعجاز سماں اور دیگر نے بھی خطاب کیا۔قلعہ دیدار سنگھ+لدھیوالہ وڑائچ سے نمائندہ خصوصی کے مطابق امتیاز صفدر وڑائچ کے ڈیرے پر پریس کانفرنس میں پرویز اشرف نے کہا پاکستان پیپلز پارٹی ملک کی سب سے بڑی سیاسی جماعت ہے۔جس نے ہمیشہ الیکشن میں سرپرائز دیا ہے اور ہماری جماعت اپنے بل بوتے پر الیکشن لڑے گی۔لیول پلئینگ فیلڈتمام سیاسی جماعتوں کا حق ہے۔ دانیال عزیر سمیت تمام لوگ بہت جلد بلاول بھٹو زرداری کی زبان بولیں گے۔
