لاہور ( این این آئی) لاہور کی فضائیں ایک بار پھر انتہائی مضر صحت ہوگئیں، دنیا بھر کے آلودہ شہروں کی فہرست میں پہلے نمبر آگیا جبکہ کراچی تیسرے نمبر پر رہا۔ایئرکوالٹی انڈیکس کے مطابق پیر کو لاہور کی فضائیں انتہائی مضرصحت ریکارڈ رہی اسی باعث دنیا کے آلودہ شہروں کی فہرست میں پھر سے پہلے نمبر پر آگیا۔لاہور  کا ایئر کوالٹی انڈیکس 412ریکارڈ کیا گیا جبکہ کراچی کا فضائی معیار بھی انتہائی خراب رہا، شہر قائد میں پرٹیکیولیٹ میٹرز کی تعداد 209 ریکارڈ کی گئی۔دوسری جانب پاکستان کا پڑوسی ملک بھارت کا دارالحکومت دہلی آلودہ ترین شہروں میں دوسرے نمبر پر رہا ہے۔محکمہ موسمیات کے مطابق لاہور شہر میں صبح سویرے ہلکی دھند پڑی جبکہ سردی میں اضافہ ہوا ہے، صبح سویرے درجہ حرارت 11ڈگری سینٹی گریڈ ریکارڈ کیا گیا۔محکمہ موسمیات کے مطابق شہر میں بھی موسم خشک، صبح اور رات میں ٹھنڈی ہوائیں چلیں گی، شہر کا اس وقت موجودہ درجہ حرارت 18ڈگری سینٹی گریڈ ہے جبکہ ہوا میں نمی کا تناسب 60 فیصد رہا ۔ فضائی آلودگی کے باعث شہریوں کا سانس لینا بھی محال ہو چکا ہے۔طبی ماہرین نے شہریوں کو احتیاطی تدابیر اختیار کرنے کی ہدایت کرتے ہوئے کہا کہ لوگ بلا وجہ گھر سے نہ نکلیں اور ماسک کا استعمال ضرور کریں۔محکمہ موسمیات کا کہنا ہے کہ اگلے چند روز میں لاہور میں بارش کا کوئی امکان نہیں۔