لاہور(سپورٹس رپورٹر)ایف آئی ایچ کے زیر اہتمام ملائشیا کے شہر کوالمپور میں 5 تا 16 دسمبر کھیلے جانے والے جونیئر ہاکی ورلڈ کپ میں پاکستان نے اپنے پول کے دوسرے میچ میں نیوزی لینڈ کو 0-4 سے ہرادیا۔ ارشد لیاقت نے بہترین کھیل پیش کرتے ہوئے ہیٹ ٹرک کی۔ ارشد لیاقت نے 19 ویں، 30ویں اور 54ویں منٹ میں تین گول کئے۔ کپتان عبدالحنان شاہد نے 32 ویں منٹ میں پینلٹی کارنر کے ذریعے ایک گول کیا۔نیوزی لینڈ کی جانب سے کھیل کے اختتام تک کسی کھلاڑی نے گول نہیں کیا۔مین آف دی میچ ارشد لیاقت قرار پائے۔پاکستان ایونٹ کا تیسرا میچ 9 دسمبر کو بیلجیئم کیخلاف کھیلے گا۔ پاکستان اور نیدرلینڈز کے درمیان پہلا میچ 3-3 گول سے برابر ہوگیا تھا۔