بہاولپور میں مسافر بس ٹرک سے ٹکرا گئی، 5 افراد جاں بحق، 15زخمی
بہاول پور(بیورو رپورٹ) بہاول پور کے نزدیک قومی شاہراہ پر بس اورٹرک کے تصادم میں 5 افراد جاں بحق اور 15 زخمی ہو گئے ۔زخمیوں کوبہاول وکٹوریہ ہسپتال منتقل کر دیا گیا۔ قومی شاہراہ پر الحق کاٹن فیکٹری اور نواباں آئل مل کے قریب مسافر بس عمارتی سامان سے لدے چھکڑے کو بچاتے ہوئے ٹرک سے ٹکرا گئی جس سے ٹرک میں آگ بھڑک اٹھی۔ ٹرک پر کپاس لدی ہوئی تھی ۔ حادثے کے باعث قومی شاہراہ پر پیچھے سے آنے والی بسیں بھی ٹرک سے ٹکرا گئیں۔ حادثے میں جاں بحق ہونے والوں میں لیاقت پور کا اعجاز ، ٹوبہ ٹیک سنگھ کا محمد جاوید اختر ولد بشیر احمد، فیصل آباد کا ایم شہزاد اور دو نا معلوم افراد شامل ہیں۔حادثہ میں زخمی ہونے والوں میں لیاقت پور کی ثوبیہ بی بی ، رحیم یار خاں کا خالد، بدر شیر کی زوبیدہ بی بی، خان پور کا ظفر اقبال ، فیصل آباد کا مقصود ، بدر شیر کی جمیلہ بی بی ، خان پور کا چراغ دین، خان پور کی ساجدہ بی بی ، خان پور کی حرا، حیات پور کا غلام فرید ، حیات پور کا مدنی، خانیوال کا اکرام اور گری گنج بازار بہاول پور کا امین شامل ہیں۔9 زخمیوں کو ڈسچارج کر دیا گیا ہے جبکہ باقی زیر علاج ہیں۔بس اور ٹرک کے ڈرائیور آگ کی لپیٹ میں آکر موقع پر ہی جاں بحق ہو گئے۔محسن نقوی نے بہاولپور بائی پاس روڈ پر ٹریفک حادثہ میں قیمتی انسانی جانوں کے ضیاع پر اظہار افسوس کیا ہے۔ حادثے کے بارے میں رپورٹ طلب کر لی ہے اور کہا غفلت کے ذمہ دار ڈرائیور کے خلاف قانونی کارروائی کی جائے۔
