راولپنڈی (نوائے وقت رپورٹ) اڈیالہ جیل اور اس کے اطراف میں 10 گھنٹے بعد بجلی بحال کر دی گئی۔ جیل انتظامیہ کے مطابق 10 گھنٹوں سے زائد اڈیالہ جیل اور ملحقہ علاقوں میں بجلی معطل رہی۔ جو اب بحال کر دی گئی ہے۔ جیل ذرائع نے بتایا کہ اڈیالہ جیل میں بجلی کے متبادل نظام کے طور 2 جنریٹرز سے کام لیا گیا۔ آئیسکو ذرائع نے بتایا کہ 132 کے وی ٹرانسمشن لائن پر کام کے باعث علاقے میں بجلی کی سپلائی معطل رہی اور جیل انتظامیہ کو 13 دسمبر کو بجلی سپلائی کی معطلی سے آگاہ کیا گیا تھا۔ خیال رہے کہ پاکستان تحریک انصاف کے سابق چیئرمین و سابق وزیر اعظم عمران خان، فواد چوہدری اور شاہ محمود قریشی سمیت دیگر سیاسی رہنما اڈیالہ جیل میں قید ہیں۔