جنرل ساحر شمشاد کو میڈل آرڈر آف دی سٹار آف اردن سے نواز دیا گیا
اسلام آباد (خبر نگار خصوصی) چیئرمین جوائنٹ چیفس آف سٹاف کمیٹی جنرل ساحر شمشاد مرزا کو اردن کے بادشاہ نے میڈل ’آرڈر آف دی سٹار آف اردن‘ سے نواز دیا۔ پاک فوج کے شعبہ تعلقات عامہ (آئی ایس پی آر) کے مطابق چیئرمین جوائنٹ چیفس آف سٹاف کمیٹی جنرل ساحر شمشاد نے اردن کے دورے کے دوران اردن کے بادشاہ عبداللہ دوم ابن الحسین سے ملاقات کی۔ ملاقات میں دوطرفہ سیاسی، سفارتی اور فوجی تعاون اور موجودہ علاقائی سلامتی کی صورتحال سمیت دلچسپی کے مختلف شعبوں پر تبادلہ خیال کیا گیا۔ اردن کے بادشاہ عبداللہ ابن الحسین نے چیئرمین جوائنٹ چیفس آف سٹاف کمیٹی جنرل ساحر شمشاد مرزا کو ان کی شاندار خدمات کے اعتراف میں میڈل ’آرڈر آف دی سٹار آف اردن‘ سے نوازا۔ چیئرمین جوائنٹ چیفس آف سٹاف کمیٹی نے اپنے اردنی ہم منصب میجر جنرل یوسف یوسف احمد الحنیطی اور اردن کی مسلح افواج کے کمانڈر بریگیڈیئر جنرل محمد حیات سے بھی الگ الگ ملاقاتیں کیں۔
