لاہور(سپورٹس رپورٹر) بھارت کیخلاف ڈیوس کپ کیلئے پاکستان ٹینس ٹیم کا اعلان کردیا گیا، اعصام الحق کپتان ہوں گے۔اسلام آباد میں صحافیوں سے گفتگو کرتے ہوئے پاکستان ٹینس فیڈریشن کے صدر سلیم سیف اللہ نے کہا کہ بھارت کیخلاف 3 اور 4 فروری کو اسلام آباد میں ہونیوالے ڈیوس کپ گروپ ون ٹائی میں پاکستان کی نمائندگی اعصام الحق، عقیل خان، محمد عابد، محمد شعیب اور برکت اللہ کریں گے۔انہوں نے کہا کہ ہماری کاوشوں کے باعث پاکستان نے ڈیوس کپ کی میزبانی حاصل کی، بھارت کو انٹرنیشنل ٹینس فیڈریشن کے سامنے ذلت کا سامنا کرنا پڑا، حیرانی ہے کہ مودی سرکار ٹینس میں بھی سیاست کر رہی ہے۔انہوں نے کہاکہ انٹرنیشنل ٹینس فیڈریشن نے ہمارا موقف تسلیم کیا ہے۔ سیاست اپنی جگہ لیکن کھیلوں میں ایسا نہیں ہوناچاہیے۔