پشاور: ڈکیتی مزاحمت پر فائرنگ، یونیورسٹی کا طالب علم قتل، ساتھیوں کا مظاہرہ
پشاور (بیورو رپورٹ) پشاور کے علاقہ دائود زئی شغالئی میں راہزنی کے دوران مزاحمت پر موٹر سائیکل سوار ملزموں کی فائرنگ سے نمل یونیورسٹی کا جوان سال طالبعلم دانش جاں بحق جبکہ اس کے 2 قریبی رشتہ دار حبیب خان اور حلیم شیر زخمی ہوگئے۔ دوسری جانب واقعے کے خلاف نمل پشاور کیمپس کے طلبہ نے یونیورسٹی روڈ پر اور بعد ازاں پریس کلب کے سامنے احتجاجی مظاہرہ کرتے ہوئے سڑک کو ٹریفک کیلئے بند کر دیا، جس کے باعث ٹریفک کا نظام درہم برہم ہوکر رہ گیا تاہم بعد ازاں مظاہرین منتشر ہو گئے۔ دریں اثناء ایس ایس پی آپریشنز نے واقعے کا نوٹس لیتے ہوئے ایس پی رورل کی سربراہی میں انوسٹی گیشن ٹیم تشکیل دے دی ہے۔
